Sa data símbulu po sa manifestatzioni est sa de su 6 de Austu 2016, su de coranta (40°) anniversàrius de sa morti de s’operaju forestali Giuseppe Muntoni, connotu cumenti a Nino, mortu in su 1976 in s’interis de sa studadura de unu fogu mannu meda pigau in is montis aroru de Biddacidru in localidadi “Tuviois”.
S’Assótziu “Progetto Comune” prumovit s’acontéssiu “Per non dimenticare” (Po no iscaresci), una dí de reflessioni apitzus de is fogus cun arrelatu particulari a su perígulu chi benit de is fogus de padenti. Sa data símbulu scioberada po sa manifestatzioni est sa de su 6 de Austu 2016, su de coranta anniversàrius de sa morti de s’operaju forestali Giuseppe Muntoni, connotu cumenti a Nino, mortu in su 1976 in s’interis de sa studadura de unu fogu mannu meda, scapau a tenni in is montis aroru de Biddacidru in localidadi “Tuviois”, innói fiant abbruxaus 400 etarus de padenti. Sa noba iat tentu arretronu a livellu natzionali. “ Su poberitu – scrit “L’Unità” de su 8 Austu 1976 – imparis a àterus operajus de sa forestali fiat trabballendi cun is scuadras antincéndiu po domai is fiammas partidas in unu padenti tipiu tipiu in localidadi “Cudioris” candu s’est biu totu in una ingiriau de su fogu. Mentras is àterus óminis funt arranéscius a lompi in unu logu a su seguru de su fogu, Sisinnio Muntoni est abarrau cassau intra de is fiammas e is tentas cosa sua de si salvai funt istétias inútilis”. A s’operaju forestali est istétia dedicada una losa in su logu innói at pérdiu sa vida e unu castiadroxu antincéndiu in su cúcuru de su monti Cucurdoni Mannu chi est istétia tzerriada “Rifugio Muntoni”.
Su Prefetu duus annus apustis sa morti tràgica iat intregau a sa famíllia una medàllia de oru a su balori civili. Sa proposta non bolit essi iscéti un’arremoni doverosu ma pigai unu significau profundu, bessendi motivu de reflessioni e spratzidura de sa cultura de s’arrespetu de s’ambienti, chentza de si scarésci mai chini po custa càusa at sacrificau sa vida cosa sua. Sa tarea est cussa puru de tenni artu su livellu de sensibbilizatzioni, serbendusí puru de is testimóngius passaus, po fuiri dannus ambientalis e tragédias umànas causadas de is fogus. Su 6 de Austu, a is dexi de a mengianu (10,00) nc’est sa Santa Missa in sa crésia de Santa Brabara in arragodu de s’operaju mortu in manera tràgica. A is úndixi (11,00) s’inàugurat s’ammosta “Incendi e dintorni”, a incuru de sa “Agenzia Forestas”, “Franca e Fabio Fotografi” e su giornali “online” “Villacidro.info”, in s’ex Molino Cadoni innói, a sighiri, ddoi at un’atóbiu púbblicu apitzus de is fogus de padenti. A s’atóbiu intervenint: Marta Cabriolu, Síndigu de Biddacidru, Massimiliano Pilia, Presidenti ASS.FOR.,Franco Saba, ex dirigenti de su CFVA de sa Regioni Sardigna, Giuseppe Mariano Delogu, dirigenti de su CFVA de sa Regioni Sardigna, Giuseppe Pulina, Amministradori Únicu Agenzia Forestas, Antonio Casula, Diretori generali Agenzia Forestas e Donatella Spano, Assessora regionali a sa Difesa de s’Ambienti.
Annalisa Caboni Operadora de s’Ufítziu de Língua Sarda Província Sud Sardigna sea de Biddacidru
