Mai cumenti a ocannu is acontéssius de s’Istadi Cirdesa (“Estate Villacidrese”), organizada de su Comunu, funt smenguaus a s’ossu. Funt atesu is annus candu fiant programmaus prus de 15 “films”, intra de cínema cummerciali e de autori, e su campu de su Parcu n°2 “Le Casermette” si preniat de non crei. In s’interis in su Parcu de bia Repubblica andàt a ammachiadura su “Splashball”. Su campu sportivu istrangiàt invécias una série de grandus acontéssius musicalis cun nóminis de su càlibru de “Litfiba”, “Nomadi”, “Negrita”, “Pooh”, e aici sighendi. Non ammancànt is seradas dedicadas a su baddu o a is torneus de pallacanestru e calcetu. Totu custu in is annus est andau smenguendi fintzas a s’editzioni 2016 innói in programma ddoi at tres cuncertus, un’arrapresentatzioni teatrali e sa presentada de unu líbburu. Eus inténdiu s’assessori a sa Cultura e a is Políticas Giovanilis, Giovanni Spano, e dd’eus pregontau cumenti mai su programma est diaici redúsiu e at nau chi “Non fai cínema est iscéti una scera, s’est decidiu po una programmatzioni de custu generi, po una série de arraxonis, prima intra de totus s’inadeguadesa de is istruturas e de is atretzaduras in possessu de su Comunu. Sa cifra impignada est modesta po spetàculus chi circant de benni incontru a is abbisóngius e a is gustus de totus. Nudda de trascendentali: in cunformas cun sa política nosta de is “cosa piticas, fatas beni e fatas po interu”. Intanti, própiu oi, nc’est su primu cuncertu de custa “Istadi Cirdesa” (Estate Villacidrese) formau ligeru, cun su triu “The lawyers” chi si fait a biri in Pratza Lavatoio a is dexi de a noti (10,00). Is àterus spetàculus funt: “Sonetàula” a incuru de s’Assótziu “Tra parole e musica”, su 10 de Austu in su Lavatoio e su cuncertu de is “Almamediterranea” in programma su 16 de Austu, sémpiri in Pratza Lavatoio. Su 21 de Austu spàtziu a sa cummédia teatrali a incuru de sa cumpangia teatrali “Sa Spendula” chi apariciat su palcu in s’anfiteatru de bia Repubblica. A s’acabbu su de cincu acontéssius est sa presentada de su líbburu de poesias de Ugo Magnanti, in programma su 27 de Austu in su Mulino Cadoni.
Annalisa Caboni Operadora de s’Ufítziu de Língua Sarda Província Sud Sardigna sea de Biddacidru
