Pigat forma sa de 31 editzionis de su Prémiu “Giuseppe Dessí”, su cuncursu literàriu intitulau a su scritori sardu, in programma de su 19 fintzas a su 25 de Cabudanni in Biddacidru. Biddacidru strangiat sa cida culturali costumada chi fait de guarnissa a su prémiu prumóviu de sa “Fondazione Dessí” e de su Comunu, e chi in s’úrtima serada culminat cun sa procramatzioni e sa premiatzioni de is bincidoris. A si cuntendi sa vitória funt is tres finalistas de donniuna de is duas setzionis de su pérmiu, scioberaus intra de is autoris de is 345 òperas, 212 de narrativa e 133 de poesia, chi funt lómpias a sa segreteria de su cuncursu aintru de su términi úrtimu de su 20 de Argiolas passau. Su cómpitu de cerri is scritus e scerai is duas ternas finalistas spetat immui a sa giuria de espertus ghiada de Anna Dolfi. Cust’annu puru, in pàliu po is bincidoris de is setzionis relativas, narrativa e poesia, ddoi at cincumilla eurus (5.000€) mentras a dónnia finalista andat unu prémiu de 1.500 €. A is duas setzionis literàrias in sensu strintu de su cuncursu, si acostat ancoras una borta su “Prémiu Speciali de sa Giuria” ( custu puru de sa cifra de cincumilla eurus): un’arreconnoscimentu de intregai a una figura de importu de sa cultura, de sa sociedadi o de sa política italiana, e chi in is editzionis passadas est andau a pesonalidadis de su càlibru de Luigi Pintor, Sergio Zavoli, Alberto Bevilaqua, Arnoldo Foà, Francesco Cossiga, Marco Pannella, Piero Angela, Ascanio Celestini, Mogol, Philippe Daverio, Toni Servillo e Piera Degli Esposti. A incumentzai de lunis 19 de Cabudanni, unu cartelloni tipiu tipiu de acontéssius at a acumpangiai su cuncursu faci a sa serada de acabbu de domínigu 25 e sa cirimónia de premiatzioni de is bincidoris: ammostas, atóbius literàrius, labboratórius didàticus, leturas e récitas musicalis, propostus in logus diferentis de Biddacidru, cun epicentru in sa domu chi est stétia de sa famíllia de Giuseppe Dessí e innui oi tenit sa sea sa fundatzioni a issu intitulada chi, a parti s’organizatzioni de su prémiu, curat sa cunservatzioni e s’avaloramentu de s’òpera de su scritori. Intra de is ospitis giai cunfirmaus, s’atori e scritori Alessandro Bergonzoni, is cantautoris Andrea Chimenti e Cristiano De Andrè, is scritoris Clara Sanchez e Carlo Lucarelli, s’illustradori Roberto Innocenti.
