Su deputau de Unidos, Mauro Pili, lànciat s’allarmi contras a is fogus chi in s’úrtimu mesi at fertu medas aziendas agrícolas sardas. Segundu su políticu sardu a palas de custus acontéssius, de seguru de orígini dolosa, si iant a cuai tentas de “matrici unitària” acapiaus a “ fenòmenus de “racket” opuru unu pianu speculativu acapiau a tretus mannus de terra paris”. Is aziendas fertas funt totus cuncentradas in zonas paris de sa Sardigna meridionali. Seus chistionendi de aziendas mannas meda, chi tenint, a bortas, prus de 300 ètarus. “ Totus is aziendas – denúnciat su deputau sardu – funt stétias fertas in manera precisa a su coru produtivu:domus de palla e machinàrius indispensàbbilis po sa condutzioni de sa messarítzia”. A palas de custa chi est stétia difinida cumenti a una “escalation” criminali bera e própia, ddoi iat a essi una costumàntzia, medas bortas impreada in su territóriu sardu, chi punnat a ndi pinnicai is cuntribbutus púbblicus cun sa scusa de creai postus de trabballu o torrendi a pagai cun is finiallas su pópulu sardu. “ Difatis – precisat Mauro Pili – no est unu segretu chi sociedadis prus o mancu a sa luxi de su soli funt ponendi asuta de atacu sa Sardigna po su chi pertocat progetus speculativus acapiaus a is intzidus energéticus.
E nimmancu est unu segretu chi, po sa matessi ammissioni de custus faineris, si circant terrenus agrícolus paris e de grandu mannària ca costant prus pagu de is chi funt in is zonas industrialis”. S’apellu de su políticu sardu est rivólgiu a su Ministeru de s’Ambienti chi “ depit luegus ativai totus is atzionis necessàrias po chi custus atentaus sighius non scéti bengiant firmaus ma si pongiant in éssiri totus is propostas útilis a stabbiliri sa matrici de custus gestus criminalis”.
Pili at denunciau sa presentada de un’interrogatzioni parlamentari po totus is atentaus ponifogu chi ant fertu unas cantu aziendas in is sartus de Ortacesus, Biddesorris, Santu ‘Éngiu, e cussas ogetu de sa speculatzioni energética in is sartus intra de Gùspini e Gonnos. “Serbit un’atentu particulari – acabbat Pili – poita medas elementus funt simbillis e no est pentzàbbili no aberri unu fronti unitàriu de scrucullu po cumprendi si ddoi at o no calincunu fenomenu criminali chi est atentendi a sa messarítzia sarda”.
Annalisa Caboni
Operadora de s’Ufìciu de Lìngua Sarda Provincia Sud Sardigna sea de Biddacidru
