Gonnos. Custu mengianu, una delegatzioni de imprendidoris agrícolus e de allevadoris at atobiau su deputau de “Unidos”, Mauro Pili, portaboxi de sa gherra cosa insoru contras a un’azienda chi iat a bolli stallai apitzus de is terrenus cosa insoru un’impiantu termodinàmicu chi iat a frutai prus o mancu 2 miliardus de eurus. Is agricoltoris e is allevadoris ant acetau is cunditzionis de sa dita e timint s’esprópiu de is terrenus cosa insoru. Is imprendidoris chi iant a bolli imbistiri in is terras de su Campidanu de Mesu, difatis, a fronti de una batalla cumentzada in su 2013 chi no est arrannéscia a piegai sa resisténtzia de is messajus ant ameletzau sa possibbilidadi de recurri a su deretu de esprópiu de is terrenus po sa costrutzioni de un’impiantu chi iat a portai benefícius po totu sa comunidadi. Segundu sa dita, in prus, is terrenus no ancoras achirius iant a essi chentza de trabballai e sbandonaus de unu totu. Mauro Pili est lómpiu in is terrenus in chistioni, inditendiddus cumenti a produtivus siat de su puntu de bista agrícolu chi de su de s’allevamentu. Su deputau at denunciau una “tenta de imboddicu” de parti de is imprendidoris chi iant a bolli paperi biancu apitzus de is terrenus de is messajus.
“Custus imboddicheris – narat Mauro Pili – ant delegau unu faineri chi si narat Luciano Lussorio Virdis, chi cun cuntratus at circau de cumbinci is propietàrius de is terrenus a ddus donai po sa cifra de 1.200 eurus a ètaru a s’annu po 30 annus”. “Custa personi iat a guadangiai, si arrannescit in sa tenta cosa sua, prus o mancu 1 millioni de eurus, mentras si si faint is impiantus termodinàmicus sa dita arresponsàbbili de su progetu iat a lograi prus o mancu 2 miliardus de eurus addebbitaus in is bulletas de sa currenti de is sardus e de is italianus, a fronti de una spesa de scéti 18 millionis de eurus”. “Custas personis – sighit Pili – funt acapiadas a strintu a su guvernu centrali ghiau de Matteo Renzi e funt portaboxi de una strategia chi bolit assugetai e colonizai su pópulu sardu, pretendendi chi siat dipendenti in totu e po totu de foras chentza sa possibbilidadi de produsi su chi serbit po bivi cun dinnidadi”.
S’impiantu termodinàmicu iat depi tenni una cobertura totali de 500 ètarus e unus cantu propietàrius de sa zona iant ai giai firmau s’acórdiu, prexaus de is cifras propostas po sa cessioni de is terrenus, ma chentza sa firma de is propietàrius chi abarrant s’impiantu non si podit fai. “Sa famíllia cosa mia trabballat e bivit in custas terras de unus centu annus – narat Sandro Putzolu, propietàriu de una azienda agrícola chi at arrefudau su cuntratu de cessioni – non eua a acetai mai de essi bogaus de speculadoris chi si bolint scéti preni is busciacas cosa insoru de dinai e si lassai is arruinas cumenti a arregalu”.
Annalisa Caboni
Operadora de s’Ufìciu de Lìngua Sarda Provìncia Sud Sardigna sea de Biddacidru
