916 Milla eurus po is dannus causaus de is animalis arestis a is proditzionis de pisci e a cussas agrícolas. Asuba de sa proposta de s’Assessora de sa Difesa de s’Ambienti, Donatella Spano, sa Giunta, a séguitu de sa organizatzioni noba de is autonomias de su logu, at aprovau ariseru sa spartzidura de is indennizus 2016. Prus de sa mitadi de su dinai nci at a bessiri po is indennizus chi ant causau is animalis arestis a is produtzionis de sa messarítzia e de s’allevamentu, e at a essi pratziu intra de is Amministratzionis de is províncias de Casteddu, Sud Sardigna, Aristanis, Nùgoro e Tàtari, cunformas a is critérius chi sa matessi Giunta iat istabbiliu a innantis. Su dinai chi abarrat at a serbiri po is dannus chi ant procurau is crobus de mari (ndt. “cormorani) a is produtzionis de pisci, e andat pratziu intra de is Províncias de Aristanis, Casteddu, Sud Sardigna (ex Província de Carbònia-Igresias), Nùgoro (ex Província de s’Ogiastra) e Tàtari (ex Província de Tàtari e ex Província de Terranoa – Témpiu).
S’Esecutivu in prus at aprovau sa pratzidura de 400milla eurus destinaus a s’agiudu e a su recuperu de is animalis arestis terrestris e marinus ferius o in dificultadi. Sa cifra stabbilida andat po 240 milla eurus a is Províncias. A Casteddu arribbant 34.285,72 eurus. Sa matessi cifra andat a Tàtari -Terranoa e su Sud Sardigna (Biddacidru e Bidda Mratzàxia): 68.571,42 eurus. Nùgoro (Tortolì) e Aristanis ant a arriciri cadauna 34.285,72 eurus. Is 160 milla eurus chi abarrant ant a andai, in seti partis agualis (22.857,14 eurus) a is sugetus de sa “Rete”Arretza Regionali po sa cunservatzioni de sa fàuna marina. Formant sa “Rete” is cincu Àreas Marinas Amparadas: Ísula de s’Asinara, Cabu Cassa- Ísula Piana, Cabu Crabonaxa, Taulara – Punta Coda Cavallo (Punta Coa de Caddu?), Penísula de su Sinis – Ísula de Maluentu, Parcu Natzionali Sa Maddalena e su Comunu de Pula po is operatzionis de agiudu, recúperu e libberatzioni de is animalis marinus prevídias de su protocollu de intendida arremonau.
