Funt prus o mancu 10milla is clientis de su Campidanu de Mesu interessaus de sa campàngia Consumus Segurus in cursu in su mesi de cabudanni. Giai de s’annu passau Abbanoa at afortiau su servítziu de relevadura de is leturas, aumentendi is subralogus e duncas sa faturatzioni de is consumus relevaus. “Is clientis – spricat sa sociedadi in unu comunicau po is giornalis – in custa manera funt prus informaus apitzus de s’andamentu de is consumus cosa insoru e de is costus relativus”. “Apustis de ai bogau is bulletas in acontu ( a parti is casus de cuntadoris de aintru e chi non si nci podit arribbai) cun sa sterrida de sa letura certificada de is contadoris po médiu de palmaris eletrónicus, a incumentzai de s’istadi passada, est partida una rivolutzioni noba po is bulletas de su servítziu de s’àcua integrau”.
Po su chi pertocat is biddas interessadas de sa campàngia programmada po custu mesi, is leturas ddas faint dónnia tres mesis in is biddas prus mannas cumenti a Biddacidru (5.107 clientis) e Seddori (3.568). In is àteras biddas is leturas ddas faint dónnia cuatru mesis.
A s’insinna de sa trasparéntzia màssima, in su giassu aziendali si podit castiai su caledàriu innui funt inditaus, comunu po comunu, is mesis chi is ténnicus de Abbanoa faint is leturas de is contadoris e is mesis chi mandant sa bulleta.
Annalisa Caboni Operadora de s’Ufíciu de Língua Sarda Província Sud Sardigna, sea de Biddacidru
