Biddacidru. Discútiu, stimau, criticau e votau. Si iat a podi arresúmini in cuatru fueddus su profilu políticu de Adriano Muscas. Po sa de tres bortas de sighiu arrannescit a conchistai una cadira aintru de su Consillu Comunali de Biddacidru. In s’úrtima torrada eletorali est arrannésciu a si fai donai fidúcia de is citadinus cosa sua cun 500 preferéntzias. Sa candidadura cun sa lista “Alternativa Civica” fiat parta luegus atrivida: si ponni imparis cun chini dd’at cumbàtiu de is bangus de s’opositzioni cincu annus, iat fatu nasci calincuna duda puru aintru de su grupu. Non sémpiri at cumpartziu is órdinis arricius de is partidus e custu dd’at fatu bessiri unu “cani scapu” de sa política cirdesa, tanti de si depi dimiti, a unu certu puntu, de su Partidu Democràticu. Scera chi ddi fiat costada sa cadira de assessori in sa Giunta Pani. Parrit chi is raportus cun sa Giunta noba, ghiada de Marta Cabriolu, siant guastendusí po nexi de cussu individualismu chi de sémpiri dd’at contraddistintu. Sa “Villaservice” e su “Consorzio Industriale” fiant is postus prus disigiaus de ex assessori. Apustis de ai biu sparessi sa possibbilidadi de presidiri sa Villaservice, e apustis de ai arrefudau un’assessorau, sa scera est arruta po fortza asuba de su “Consorzio Industriale”, mancai cun sa tenta de pigai su postu de Giorgio Danza in sa cadira presidentziali. Po immui s’at a depi acuntentai de sa càrriga de consilleri aintru de su diretivu de su Consorzio, chentza scaresci chi sa sua est una délega fiduciària e in custu períodu parrit non ndi siat logrendi meda! Apustis prus de unu mesi de intervistas tentadas e domandas de acraramentus apitzus de su ruolu nou aintru de su “Consorzio Industriale”, no at ancoras fatu nisciuna decraratzioni. Scéti in un’ocasioni dd’eus nau ainnantis is contenutus de s’intervista. Ddi iaus ai bófiu pregontai calis funt is progetus chi est portendi a innantis po afortiai su Consorzio Industriale, cali est su stadu de saludi de s’enti e si apat mai fatu un’intrada a is atus po ddu averiguai. S’arraspusta cosa sua est stétia disarmanti. “ Deu non seu un’inchisidori”. Po unu chi fait parti de unu grupu políticu chi porta su nómini de Giovanni Falcone (Comitato Possibile “Giovanni Falcone” Biddacidru), su magistrau chi at pagau cun sa vida sa gherra contras a sa màfia, un’intrada a is atus iat a depi essi su mínimu po garantiri sa condota bona de unu enti diaici stratégicu po su tessutu sóciu-económicu de su Campidanu de Mesu. Ddi iaus ai bófiu pregontai po cali motivu apat fatu bísita a is impiantus de sa “Villaservice”, e cun chi apat cuncordau sa bísita. E po su chi pertocat su ruolu passau de Assessori a s’Ambienti in sa Giunta Pani, ddi iaus ai bófiu pregontai cumenti est possíbbili chi 4 allevadoris de procus téngiant sa mellus apitzus de ténnicus, Fortzas de s’Órdini, políticus de sa Asl e poita custu bubboni no est stétiu bogau in su nasci candu Fusteti fiat Assessori? Bai sciri ita iat a nai Giovanni Falcone!
Annalisa Caboni Operadora de s’Ufíciu de Língua Sarda Província Sud Sardigna sea de Biddacidru
