BIDDACIDRU. Non prus unu muntonàrgiu a celu obertu, ma unu parcu innui passai calincuna ora e fai giogai is pipius. In Pratza “Martiri di Buggerru” su Comunu, apustis de ndi ai tirau totu s’erba mala, at postu puru giogus po pipius, una santzianedda e unu líscinu.
Is citadinus de annus pediant a su comunu de sistemai sa pratza e scéti apustis de su subralogu de duus assessoris, Giuseppe Ecca e Marco Erbí, e su cabucantieri de su Comunu, funt inghitzaus is trabballus po donai vida noba a su chi oramai fiat bessiu unu campu sbandonau. Is operàjus de su Comunu in pagus dís ant donau una vida a sa pratza noba.
“Bollu torrai gràtzias a sa Giunta – decrarat Alberto Onnis – po sa tenta, ddi nau diaici fintzas a candu no at a essi acabbau, de cambiai sa chi fiat una discàrriga a celu obertu in unu puntu birdi in su centru de Biddacidru”. S’Assessori a s’Ambienti, Marco Erbí impromitit s’acabbu de is trabballus in tempus crutzus e annúnciat :” Apustis p ddu preneus a pradu birdi e nci lompeus s’àcua”.
