BIDDACIDRU. “No apenas su CDA de su cunsórtziu at a essi difiniu, deu ddu speru meda, poita, puru, nc’est sa pantàsima de su commisariamentu, e est una cosa probbabbili meda, ca sa política, po nci fai andai una persona, fatuvatu fait gioghitus po chi sa persona abarrit a una parti e deu a una parti no abarru, poita apa a essi ingunis po castiai e apa essi ingunis puru po guvernai e iscioberai is mellus istrategias de ponni in campu cun s’Amministratzioni”. Fueddus tostus cussus de Adriano Muscas, consilleri comunali e delegau de su Síndigu in su Consillu de Amministratzioni de su Cunsórtziu Industriali de su Campidanu de Mesu. No est unu mistériu chi Muscas si siat impignendi po sodigai s’incàrrigu de Presidenti. Sa tarea perou no est scontada. Abarrat sémpiri sa pregonta “calis funt is políticus chi funt esercitendi su poderi insoru po pigai su cuntrollu de su Cunsórtziu?”
Fatuvatu is políticus ant trabballau in manera esclusiva po amparai su “sistema”, creau in annus de políticas clientelaris, innui is interessamentus de pagus ant bintu apitzus de su benéssiri de sa comunidadi.
Su commissariamentu de su Cunsórtziu Industriali, aici cumenti timit su Consilleri Muscas, iat a permiti chi su cuntrollu e su poderi ddus apoderint sémpiris is sólitus. Is scioberus benidoris chi pertocant su Cunsórtziu e sa “Villaservice” funt determinantis po cumprendir si sa classi política noba bolit atuai progetus de svilupu nous e abbistus o si invécias sighit a fai cumenti at fatu fintzas a immui.
“Villacidro.info” in un’artículu de su 23 de Làmparas 2016, ipotizaàt su commissariamentu de su Cunsórtziu Industriali de Biddacidru, ligei poita.
