Est cumentzada custu mengianu s’operatzioni de sbarcu de is 931 disterraus sarvaus in is dís passadas in su largu de is costeras líbbicas. Funt 931 is personis lómpias custu mengianu apitzus de sa navi Dattilo de sa Guardia Costera, de custas 213 funt minoreddus. Apitzus puru tres mortus. S’operatzioni dd’at coordinada sa Capitaneria de Portu. In sa banchina de su portu cummerciali est stétia apariciada una “màchina” de s’arricidura imponenti, cun Protetzioni Civili, ASL, Croce Rossa e mediadoris culturalis, innui si donant is primu curas a is malàdius e a is ferius, cun sa aprontadura de su “iter” po s’identificatzioni. Is disterraus ant a essi cambiaus oi e totu in is struturas diferentis agatadas de sa Prefetura in is 4 províncias stóricas sardas.
