De su 19 fintzas a su 25 de Cabudanni si rennovat s’apuntamentu annuali in Biddacidru: is atóbius cun autoris, is presentadas de s’imprenta, is labboratórius didàticus, is leturas e is arrécitas musicalis funt is ingredientis de una cida culturali tipida tipida chi cumenti a sèmpiri acumpàngiat su Prémiu Dessí e chi culminat domínigu 25 de Cabudanni cun sa cirimónia de procramatzioni e premiatzioni de is bincidoris de is duas setzionis literàrias de su cuncursu: narrativa e poesia. Sa serada de acabbu incoronat puru is bincidoris de àterus duus arreconnoscimentus: su “Prémiu Speciali de sa Giuria” e su prémiu speciali “Fondazione di Sardegna” donau de sa “Fondazione Dessí” imparis a sa fundatzioni bancària. Mannu meda, cust’ànnu puru, su livellu de acunsentimentu a su cuncursu cirdesu de parti de is domus imprentadoras natzionalis, cun 345 volúminis (212 po sa setzioni narrativa, 123 po sa poesia) lómpius a sa segreteria de su Prémiu aintru de sa scadéntzia de su bandu, su 20 de Làmparas passau.
In nóminis de is ternas de finalistas e de is bincidoris de is prémius specialis, imparis a su programma de sa cida culturali cirdesa, ddus annunciant in s’interis de una cunferéntzia po is giornalis in programma cenàbara 2 de Cabudanni in Casteddu, in sa sea de sa “Fondazione di Sardegna”, in bia San Salvatore da Horta n.2. In s’atóbiu cun is giornalistas, a is dexi e mesu de a mengianu (10,00), intervenint su Síndigu de Biddacidru Marta Cabriolu, Graziano Milia, arresponsàbbili de is relatus esternus de sa “Fondazione di Sardegna”, su Presidenti de sa “Fondazione Dessí” Paolo Lusci e Duilio Caocci in arrapresentàntzia de sa giuria de su Prémiu.
Annalisa Caboni, Operadora de s’Ufítziu de Língua Província Sud Sardigna sea de Biddacidru
