“Seus is studiantis de sa classi 3^A de su Tsss (Ténnicu, servítzius sóciu sanitàrius) serali de s’Istitutu professionali “Alessandro Volta” de Gùspini. Iaus a bolli espressai su disprexeri cosa nosta po sa decisioni, pigada de su Proveditorau, de serrai su cursu de stúdiu cosa nosta po nexi de unu númunu bàsciu de iscritzionis. Nosu seus is pagus chi ndi pagaus is cunsighéntzias apustis duus annus de impignu mannu po sodigai sa tarea cosa nosta, chi est sa de arrannesci a lograi s’arrogu de paperi de scola superiori de segundu gradu.
Su ténnicu de is servítzius sóciu sanitàrius fiat s’única scola serali chi ancoras esistiat in sa zona e eus scioberau de dda trastigiai credendi chi a s’acabbu de is stúdius iaus pótziu brintai in su mundu de su trabballu in unu setori chi si praxit diaderus opuru brintai a s’Universidadi. Giai chi est una scola serali seus studiantis chi in s’interis de sa vida no ant pótziu sighiri a studiai de piciocheddus ma chi, cun totu custu, ant tentu s’atrivimentu de si torrai a ponni in giogu e chi trabballant cun impignu e cusciéntzia, mancai totus is dificultadis e is impignus chi podeus tenni cumenti a trabballu, famíllia, dificultadi económicas. Donniunu de nosu cumenti a individuu tenit is problemas cosa sua. Nosu scieus chi su podi tenni un’istrutzioni est unu deretu de totus e chi su Stadu si depit donai is benis necessàrius po podi campai un’esisténtzia dinnidosa. S’istrutzioni est de grandu importu po nosu e ddu iat depi essi in sa vida de totus e chi est prus in artu de nosu s’iat a depi donai garantzias e non istrobbai is progetus e is ambitzionis cosa nosta. Sa serrada de su Tsss serali de Gùspini cumportat s’impidimentu de lograi unu arrogu de paperi ca non ddoi at àteras scolas seralis si non in Casteddu; is costus de su biaxi po podi trastigiai in una scola diaici atesu funt mannus meda po totu nosu; non podeus nimmancu biaxai cun is mezus púbblicus ca s’úrtima curriera est a is otu e mesu de a merí (20,30) e s’úrtimu trenu est a is noioras e mesu de a noti (21,30) e is cursus seralis fatuvatu acabbant a mesunoti (24,00). Po problemas de trabballu e de famíllia non si podeus nimmancu iscriri a mengianu. Abbisóngiat a nai puru chi in sa matessi scola ant serrau puru sa tertza de su mengianu e immui is piciocheddas si agatant cunfúndias. Totu custu cumportat una sperdidura scolàstica lestra. A s’acabbu naraus: studiai est unu deretu e nosu non si arrendeus!!!
Arreconnoscentis de s’atentzioni garbosa de bosàterus, giaus is saludus coralis cosa nosta.
Annalisa Caboni Operadora de s’Ufíciu de Língua Sarda Província Sud Sardigna sea de Biddacidru
