Arriceus e pubblicaus.
“Is Segreterias de su territóriu de Fiom, Fms e Uilm e sa RSU de sa “Keller Eletromeccanica”, apustis de s’atóbiu cun s’assessora de s’Indústria, Maria Grazia Piras, chi nci fiat ariseru in sa sea de s’assessorau e totu, funt de su parri chi sa chistioni de sa Keller siat lómpia a unu momentu de grandu importu de su camminu cosa sua, e in su cuadru de is svilupus recentis, creint de importu fundamentali sa proposta, fata de un’azienda chi giai trabballat in su setori ferroviàriu de decénnius, de afitu e de compora fata lompi a is curadoris faddimentaris, po torrai a fai partiri su sítiu industriali. Proposta chi is curadoris etotu ant a esaminai apustis de su 16 de custu mesi candu scadint is términis po sa presentada de is ofertas líbberas. Custa proposta previdit un’inghitzu graduali de s’atividadi e de torrai a pigai parti de is maistàntzias in basi a su càrrigu de trabballu chi at a tenni candu pigat su stabbilimentu. In prus su programma previdit in prospetiva, sa creatzioni de unu polu regionali altamenti specializau in su setori de ferrovias e de tranvis. Su pentzamentu forti de is organizatzionis sindacalis est chi fintzas a oi a is astas po sa béndita no est andau nisciunus e chi , in custa fasi de presentada de ofertas líbberas, su Giugi e is Curadoris potzant privilegiai s’oferta económica prus bantaxosa chi previdit s’achirimentu de lotus o de parti de is ainas e duncas custu iat a cumpromiti dónnia possibbilidadi de torrai a incumentzai sa produtzioni e iat a sinnai s’acabbu difinitivu de custa realidadi industriali. Totu custu iat a cancellai totu su chi is partis socialis e sa Regioni Sardigna ant fatu po agatai un’imprendidori sériu interessau a imbistiri in Sardigna, in unu territóriu cumenti su de su Campidanu de Mesu chi s’Istat at certificau cumenti su prus póburu d’Italia. Is scriventis si augurant chi is setoris diferentis de s’azienda non siant béndius separaus e chi candu su giugi e is curadoris faddimentaris ant depi apretziai is ofertas lómpias téngiant in grandu cunsideratzioni s’aspetu sociali acapiau a un’obertura noba de sa fàbbrica chi podit donai sperantza a una parti manna de is 400 trabballadoris intra de deretus e de s’indotu, oi chentza trabballu po nexi de sa senténtzia de faddimentu, e de una realidadi industriali stratégica po su territóriu de su Campidanu de Mesu e po totu sa Sardigna. Bista sa disponibbilidadi espressada a is trabballadoris e a is partis socialis, in atóbius diferentis, domandant a is Síndigus de is Comunus de su territóriu de su Campidanu de Mesu chi fatzant intendi sa boxi cosa insoru po agiudai sa scera chi punnat a torrai a fai partiri su stabbilimentu e a su rilànciu de s’ocupatzioni. Is organizatzionis sindacalis, ant a tenni una segreteria unitària lunis 19 de Cabudanni e ant a tzerriai, po cida chi benit, un’assemblea in su stabbilimentu po apretziai, imparis a is trabballadoris, totus is propostas a agiudu de una produtzioni noba”.
Annalisa Caboni Operadora de s’Ufíciu de Língua Sarda Província Sud Sardigna, sea de Biddacidru.
