Biddacidru. Torrat a oberri su “Hotel Esit” in su coru de sa noti, ma est po strangiai 20 de is 617 disterraus africanus aproillaus ariseru a mengianu in is costeras de Casteddu, cun una navi de sa marina mercantili irlandesa. Po su deputau de “Unidos” Mauro Pili ddoi at calincuna cosa chi no andat in custa decisioni e púbblica in su profilu “Facebook” cosa sua una denúncia contras a sa pràtiga adotada po agiudai is disterraus. Su sfogu de su políticu sardu est acumpangiau de unas cantu fotografias chi ammostant su stadu de arruina de sa strutura chi s’agatat giai a s’acabbu de su centru abbitau de Biddacidru. Labai “ S’albergu béciu de s’Esit in sa Spéndula in Biddacidru – narat Mauro Pili de sa pàgini “Facebook” cosa sua – immui pagora in custa arruina cantieri funt stétius portaus 20 de is 600 disterraus. Si cumprendit chi sa prefetura est umperendi arruinas in dónnia logu, chentza de arrespetu nimmancu po is arregulas prus elementaris. Totu custu mancai si circhit de cuai sa beridadi de is fatus”. Su “Hotel Esit” est in cunditzioni de sbandonu totali de prus de 10 annus. Nàsciu cumenti a elementu de punta de is potentzialidadis turísticas cirdesas, est passau de manu in manu ainnantis de essi scarésciu de unu totu e torrau a bogai a pillu in custas úrtimas oras po su “afàriu” de sa strangia de is disterraus.
Annalisa Caboni Operadora de s’Ufítziu de Língua Sarda Província Sud Sardigna sea de Biddacidru
