Biddacidru. S’Amministratzioni Comunali ponit unu frenu a is assótzius isportivus morosus. De is ufícius de Pratza Municípiu, in su cursu de cust’úrtimus annus, funt stétias mandadas a is esponentis de sa Giunta precedenti ghiada de Teresa Pani, unas cantu comunicatzionis innui si ponit in luxi su dépidu pregressu de is assótzius isportivus in is cunfrontus de su Comunu. Non iant a essi serbidas a nudda is apretus a s’ex Síndigu e a s’ex Assessori a s’Isport Luca Garau. Sa responsàbbili de su servítziu, Graziella Pisci, poniat in luxi in una nota de su 11 de friaxu 2015, cumenti fiat stétiu cumbidau debadas s’assesssori comunali cun unas cantu notas – cunformas a su regulamentu comunali – a non intregai is istruturas a is sociedadis morosas, a su scopu de fuiri unu dannu erariali”, e duncas una cundanna possíbbili de sa Corti de is Contis. In sa matessi nota si precisàt:” Si bolit fai presenti s’espositzioni depidória gravi de sa sociedadi “Villacidrese Calcio” chi at presentau unu pianu po torrai su dépidu. A tali pianu no est stétia donada nisciuna esecutzioni, stanti su siléntziu de sa sociedadi”. Sa “Villacidrese Calcio” fintzas a intzaras iat cumpriu unu dépidu de 50.000 eurus in otu annus. Apitzus de sa chistioni intervenit s’Assessori a s’Isport de immui Marco Erbì:” Apenas aposentaus eus postu luegus manu a is morosidadis pregressas de is assótzius isportivus in manera de garantiri in su matessi momentu s’arrecúperu de is créditus e s’inghitzu de sa stagioni calcística e scéti a acabbu de austu est stétiu in manera difinitiva acordau unu pianu de torrada a sa “Villacidrese Calcio”. E s’assessori precisat:” Po cust’amministratzioni s’isport tenit unu caràtiri sociali de importu mannu meda. In un’atóbiu de pagu tempus fait funt stétias tzerriadas totus is sociedadis isportivas e totus is morosas ant pagau su dépidu”.
Abarrat duncas sa pregunta: Cumenti mai, mancai is medas richestas de is ufícius de su Comunu non funt mai stétias fatas atzioni de amparu de s’Enti? Nisciunu cummentu de s’ex Assessori a s’Isport Luca Garau. Si esponit e si difendit s’ex primu citadinu Teresa Pani, mulleri de Siro Marroccu, deputau e ex presidenti de sa “Villacidrese Calcio”. “ Non ddoi iat motivu de dennegai sa possibbilidadi a 150 piciocus iscritus in sa “Villacidrese Calcio” de umperai is campus – sutaliniat Teresa Pani- Poita, puru, su camminu incumentzau de sa sociedadi fiat giustu: est paghendi e at arrenunciau annus e annus a calisisiat cuntribbutu. S’amministratzioni at sémpiri apretziau su grandu balori de s’isport cumenti irrenunciàbbili. Creu, iat a essi stètiu fintzas illegitimu”.
Annalisa Caboni Operadora de s’Ufíciu de Língua Sarda Província Sud Sardigna, sea de Biddacidru
