Participatzioni manna po su pràngiu “Paese d’Ombre Solidale”. Genti meda, chi ndi beniat siat de Biddacidru etotu e siat de is biddas lacanantis, ariseru at pigau parti a s’acontéssiu chi punnàt a arragolli dinai po su Comunu de Amatrice, fertu de su terremotu chi at interessau su centru Italia in Austu. Manna sa cifra arragorta, chi at a andai a s’Amministratzioni Comunali de Amatrice e umperada po torrai a fai sa scola sdorrocada de su terremotu.
Luegus apustis de sa Missa, celebrada de Don Franco Tuveri, est stétia inaugurada sa giornada de cumbidu cun sa presentada de sa Banda Musicali “Città di Villacidro”. Est stétia una dí de festa, a parti che de bonucoru, arricada de tanti momentus de stentu cun is “Dj” de “Radio SuperSound”. Intra de is mesas a unu certu puntu funt bessidas a pillu is telecàmeras e is micrófonus de “Per la Strada” sa trasmissioni fortunada de “Sardegna 1” condúsia de Gennaro Longobardi; is duas puntadas specialis de su pràngiu dd’as faint a biri custas dís in s’emitenti sarda.
Annalisa Caboni Operadora de s’Ufítziu de Língua Sarda Provincia Sud Sardigna, sea de Biddacidru
