Un’editzioni chi, asuta de su títulu “ In nómini de su Babbu” (“In nome del Padre”), aberrit unu tríticu de argumentus de sighiri e svilupai in is annus chi benint, a s’insigna de sa música e de s’arti cumenti a ainas po ndi sciusciai is lacanas materialis e immaterialis a sa basi de is certus in is sociedadis e intra de is óminis.
Su cartelloni tipiu tipiu, chi andat fintzas a su 23 de Meseladàmini, cuncentrat intra de custu gióbia (6 de Meseladàmini) e domínigu 9 sa parti prus corposa, pratzida intra de sa guarnissa sólita de su cuarteri stóricu de su Casteddu, cun centru in su Teatru Cívicu in bia De Càndia, e de su giardinu asuta sa muralla de viali Regina Elena. Sa parti de su lioni spetat cumenti a sémpiri a sa música, cun grupus e solistas natzionalis e internatzionalis de generis e stilis diferentis, de su cantautoratu modernu a su “indie-rock”, de su “Blues” a s’eletrónica. In arribbu de continenti is “Soviet Soviet”, “Sorge”, “Wrongonyou”, Marco Ferrante, Niccolò Francisci, su duetu “Interiors” cun sa cantanti Serena Fortebraccio; de sa Polonia is “Pola Rise”, de s’Australia Adam Miller, de Malta su duetu “Fuzzhoneys”, de is Stadus Unius is “Ultra Violent Rays”, giogant invécias in domu is sardus: Mario Nardi & Underground Sunshine Drum Ensamble”, Carlo Addaris, “Camera Oscura”, “Trigale” e mumucs.
Intra de is nóminis de importu, su catautori e ghitarrista de is Stadus Unius Steve Wynn, su scotzesu Stuart Braithwaite, cabu, cantanti e ghitarrista de “Mogwai, sa cópia eletro-pop svítzera Kiku imparis cun Blixa Bargeld, membru e fundadori de is Einstürzende Neubauten, e cun su produtori MC Black Craker.
Annalisa Caboni Operadora de s’Ufítziu de Língua Sarda Província Sud Sardigna, sea de Biddacidru.
