Is Comitaus de su territóriu: “No Megacentrale” (Gùspini), “Terra che ci appartiene” (Gonnos), “Associazione Progetto Comune (Biddacidru), “Sa Nuxedda Free” (Biddaramosa), “Terrasana” (Deximuputzu), “Basso Medio Campidano: aria, terra, acqua” (Biddesorris), “No Al Termodinamico” (Cossoine). “No Megadiscarica” (Biddacidru) e “Associazione Italia Nostra Sardegna” sàbudu 3 de Cabudanni a is dexi de a mengianu (10,00), in su Centru Anàlisi (zona artigianali PIP) de Gonnos, ant organizau un’atóbiu generali contras a sa speculatzioni energética in Sardigna. Is comitaus e is assótzius cumbidant a is citadinus, a is amministratzionis de su logu, a is assótzius de categoria de cuntestu agrícolu, ambientali e culturali, a is fortzas políticas a pigai parti po fai fronti a s’apretu – si ligit in su comunicau – chi s’est creau apustis de is propostas de ponni in terra sarda medas mega-impiantus industrialis termodinàmicus solaris, dannosus e invasivus, de collocai in terrenus agrícolus, de custus progetus duus funt abetendi in is mesas de Roma unu bia líbbera de genia política e non ténnica”. S’assótziu “Associazione Progetto Comune” pregontat, pruschetotu a “ totus is Cirdesus de agiudai s’initziativa” e arragodant puru chi “ su territóriu cosa nosta puru est interessau de su progetu “Impiantu solari termodinàmicu de sa poténtzia lorda de 55 MWe narau “Gonnosfanadiga e opere connesse” (custu su ligóngiu a su progetu). Is chi in su progetu funt naradas “opere connesse” immui pertocant puru su comunu de Biddacidru. Su territóriu cosa nosta, difatis, iat a strangiai su passàgiu de is cavus chi portant s’energia prodúsia de sa centrali finas a s’impiantu de spartzinadura, chi est previdiu aintru de s’àrea industriali esistenti”.
Annalisa Caboni
Operadora de s’Ufìciu de Lìngua Sarda Provincia Sud Sardigna sea de Biddacidru
