Biddacidru in primu línia in sa gara de generosidadi, apustis chi unu fogu disastrosu, in sa noti de su 22 de Argiolas, at postu in genugu su sartu de Ardaule, lompendi giai in bidda. Custu mengianu unu TIR, postu a dispositzioni de sa Dita “Pilleri Movimento Terra” e unu autocarru de sa Carpenteria metàllica Gigi Atzei, ambaduas de Biddacidru, ant pigau sa bia po su Comunu de Ardaule, innói ant intregau 34 rotoballas de fenu destinadas a is allevadoris dannegiaus de su fogu. Unu de is allevadoris chi at a gosai de sa gara de generosidadi, at pérdiu mitadi de is brabeis mentras s’àtera mitadi est ingota in manera gravi. Custas is aziendas chi ant pigau parti a sa gara de generosidadi:
Azienda Agricola Piras Gianni (Biddacidru)
Az.Agr.Sogus Antioco e Luigi (Gonnos)
Az..Agr. Piras Salvatore e Piras Vincenzo (Biddacidru)
Az.Agr. Cidronuovo (Biddacidru).
Su contribbutu in dinai po s’arrifornimentu de is mezus dd’ant donau unus cantu citadinus cirdesus. Is conducentis de is mezus funt ambaduus voluntàrius e ddus ant acumpangiaus unus cantu sustenidoris de s’initziativa. A s’arribbu in su Comunu de Ardaule, unu messàgiu de generosidadi, firmau de su Síndigu de Biddacidru, Marta Cabriolu, est istétiu intregau a su Síndigu de Ardaule Roberto Putzolu.
Annalisa Caboni Operadora de s’Ufítziu de Língua Sarda Província Sud Sardigna sea de Biddacidru
