Biddacidru. Crediat de dda ai fata franca, mancai su rimproveru arriciu de un’operaju forestali in servítziu, chi si fiat acatau de intentzionis malas cosa sua. In s’interis su merí de su 15 de Austu passau, un’ómini de sessant’annus at parchegiau sa màchina cosa sua a su costau de sa strutura polifuntzionali connota cumenti “ex Casermetas” in bia Parrocchia, e at tirau a foras de su còfanu una sachita niedda de àliga. In cuss’arrenconi de strada si fiat formendi, cun s’andai de su tempus, unu muntonàrgiu abbusivu. S’antzianu at postu s’àliga cosa sua imparis a s’àtera chi giai nci fiat. In cussu momentu, Marco Deidda, consilleri comunali e dipendenti de s’Agéntzia Forestas (ex Enti Forestas) in servítziu contras a su fogu in su campu sportivu, at tentau de ddi fai cambiai idea. A is fueddus “Ita est fadendi? Non ddu scit chi non podit sbandonai s’àliga peri bia?”. S’ómini parit chi apat fatu finta de nudda, portendi a términi su propósitu cosa sua. In su matessi momentu sa scena est stétia immortalada in unu videu, chi sa cópia originali dd’at achirida su comandanti de sa Politzia Locali, Paola Campesi chi est arrannéscia a identificai su fartau de su sbandonu de s’àliga. Sa personi est stétia tzerriada, duncas, a su cumandu de Politzia Locali innui at arriciu una multa de 600 eurus. S’assessori a s’Ambienti Marco Erbí non bolit a fueddai de línia tosta ma de torrada a sa legalidadi. “ Est sa línia chi seus adotendi faci a totus is frontis: arrespetu de is arregulas, chi no arrespetat sa lei est giustu chi paghit, non nci ant a ai prus citadinus de série A e citadinus de série B. Deretus e doveris agualis po totus”.
