Bologna. Domínigu 4 de Cabudanni a is cincu de a merí (17,00) in sa “Sala delle Colonne” de su cumplessu museali s’inaugurat sa primu tapa de is ammostas chi girant in is biddas chi ant a fai a connosci in Itàlia is trabballus de is 30 bincidori de su cuncursu natzionali d’arti cuntemporànea prumóviu de su Museu “Magmma” de Biddacidru.
Unu cuncursu ideau de su diretori artísticu de su “Magmma” Walter Marchionni, po arragordai Dino Marchionni, incisori spantosu de Urbino chi arribbau in Biddacidru in su 1954, iat scioberau de passai innòi s’arrestu de sa vida cosa sua. Fintzas a su 18 de Cabudanni funt espostus non scéti is trabballus de Juan Eugenio Ochoa e de Francesco Altomare, is duus bincidoris unu po sa setzioni Pintura s’àterus po sa Gràfica, ma cussus de is àterus artistas puru – in totu 15 po dónnia setzioni – scioberaus de una giuria de calidadi intra de is 900 lómpius de totu su mundu.
Prumóviu in Meseidas 2015 su Prémiu Marchionni at atirau un’interessamentu forti de parti de artistas de totu su mundu, cumenti dimostrat su númunu mannu de òperas lómpias. Intra de is prémius intregaus fiat previdia puru un’ammosta chi girat peri is biddas de is primu 30 classificaus: apustis de sa primu tapa in su Museu “Ca’ La Ghironda” de Bologna, is àteras ant a essi sa de “Palazzo Collegio Raffaello” de Urbino e s’Archíviu “Galleria Lazzaro” de Milano.
Annalisa Caboni Operadora de s’Ufítziu de Língua Sarda Província Sud sardigna sea de Biddacidru
