“No all’Islam a Villacidro” (No a s’Islam in Biddacidru) custu est su nómini de unu grupu “Facebook” cumpartu de pagu in is pàginas de su “Social Network” famau de Palo Alto. Apustis de unas cantu dís de sa cumparta, peri is bias de sa bidda, de manifestus contras a sa preséntzia de extracomunitàrius de colori in bidda, immui arribbat una pàgina chi non fait arrelatu a s’etnia de is istràngius chi benint de natzionis in gherra, ma a una islamizatzioni presunta de s’Europa, e duncas de sa Sardigna e de Biddacidru puru. Is nobas chi ndi lompint de is médius de comunicatzioni de massa natzionalis faint a timi sémpiri de prus sa populatzioni de su logu, chi sumportat unu bombardamentu mediàticu diferenti meda, innói fueddus cumenti a religioni, terrorismu, crisi, provilégius e bonucoru ant creau cricas sémpiri prus arrannegadas intra de issas. Sa preséntzia de disterraus e extracomunitàrius peri is bias de sa bidda fait atzicai partis sémpiri prus mannas de sa populatzioni. Sa nàscida de su grupu “No all’Islam a Villacidro” podit essi interpretada cumenti a una reatzioni a una política de su guvernu inténdia cumenti atesu de is abbisóngius de is comunidadis localis. Custu po nexi puru de s’ispratzidura de nobas chi contant de tratamentus privilegiaus presuntus in is cunfrontus de is disterraus, in unu períodu chi sa populatzioni de su logu si intendit in manera particulari sbandonada de is istitutzionis. Su grupu “Facebook” nàsciu de pagu contat una bintina de iscritus, po su prus gióvunus. Is “post” chi nci funt aintru de sa pàgina ammostant s’avolotu creau de su bombardamentu mediàticu sumportau de sa populatzioni, vítima, fortzis de un’istrategia po fai a timi organizada beni.
Annalisa Caboni Operadora de s’Ufítziu de Língua Sarda Província Sud Sardigna sea de Biddacidru
