A sa Sindighessa, a sa Giunta Comunali e a is Consilleris de Biddacidru, a is Síndigus, a is Giuntas e a is Consilleris de Arbus, de Gonnos, Gùspini e Seddori, sócius de “Villaservice Spa”, a su Síndigu, a sa Giunta e a is Consilleris de Sant’Éngiu, a su Cda e a sa Presindentessa de “Villaservice” a su Presidenti de su Cunsórtziu Industriali de Biddacidru, a s’Amministradori Straordinàriu de sa Província Sud Sardigna Giorgio Sanna, a is Consilleris regionalis de su Campidanu de Mesu Rosella Pinna e Alessandro Collu, a su Consilleri regionali de Biddacidru Emilio Usula, Médicu ISDE, a su Deputau Siro Marroccu, a s’Assessori a sa Sanidadi de sa Regioni Autónoma de sa Sardigna Luigi Arru, a s’Assessori a sa Difesa de s’Ambienti de sa Regioni Autónoma de sa Sardigna Donatella Spano, e po connosciéntzia a su Commissàriu Straordinàriu de sa ASL 6 de Seddori Maddalena Giua, a is organizatzionis sindacalis CGIL, CISL, UIL, CSS, USB, a is assótzius de categoria CIA, Coldiretti, Confagricoltura, Cospargi, a is médicus de basi de Biddacidru e Sant’Éngiu, a is assótzius ambientalistas, a totus is giornalis.
DISCÀRRIGA REGIONALI DE BIDDACIDRU E COSTRUTZIONI DE SU DE TRES MÓDULUS DE SA MUNTRONAXU
Cun sa tarea se sutaponni a s’Atentzioni cosa de Bosàterus is arriscus gravis po sa saludi, certificaus de su ISDE Itàlia ( Sociedadi Internatzionali de Médicus po s’Ambienti), mandaus a is destinatàrius arremonaus s’estratu de su documentu “Sa gestioni susteníbbili de is arrefudus sólidus urbanus” (“Position Paper ISDE Italia – 12 de Austu 2015) chi su scritu integrali s’agatat a s’indiritzu: http://www.isde.it/wp-content/uploads/2014/02/2015 -08-12- Position Paper- RIFIUTI – finale.pdf
In su capítulu, chi apustis torraus a portai de unu totu, is autoris, Agostino Di Ciaula, Patrizia Gentilini, Ferdinando Laghi e Vincenzo Migaleddu, personalidadis de importu mannu in campu médicu, analizant cun rigori scientíficu, is cunsighéntzias sanitàrias apitzus de sa saludi procuradas de is muntronaxus de s’àliga.
In is moras de s’imbiu de is Osservatzionis cosa nosta a su servítziu SVA – Assessorau Regionali Difesa de s’Ambienti – in arraspusta a is integratzionis de su Consórtziu pubblicadas in su giassu de sa Regioni e chi pertocant su de tres módulus de su muntronaxu de Biddacidru – chi iat a bessiri, cun is àterus 1.500.000 mc cosa sua de capiéntzia, de aciungi a is 1.500.000 mc de is duus módulus giai esistentis, sa prus manna d’Itàlia
DOMANDAUS a is autoridadis cumpetentis de pigai ananti a is citadinus de su territóriu s’arresponsàbbilidadi de nai pubblicamenti chi is tantis suferéntzias procuradas de is medas maladias chi interessant is famíllias cosa nosta non funt puru una cunsighéntzia dereta de sa preséntzia de su muntronaxu/discàrriga de su cunsórtziu e de escludi sa possibbilidadi de una créscida cosa insoru in raxoni de s’ammanniamentu smisurau cosa sua.
DOMANDAUS Chi sa classi política e totu sa comunidadi téngiant una positzioni firma po blocai sa costrutzioni de su de tre módulus e po umperai is arrisorsas finantziàrias disponíbbilis po portai a cumprimentu is impiantus de tratamentu de is fratzionis de avalorai (imbirdi, plàstica, paperi, cartóciu, e aici sighendi) e de su sicu de avantzu. Sa strategia Arrefudus Zeru, fata cosa sua de sa Giunta Pigliaru e annunciada in su programma de s’Amministratzioni bécia e noba de Biddacidru, previdit difatis s’umperu de impiantus giai in parti amministraus de sa sociedadi “Villaservice Spa”, e iat a permiti de apoderai totus is dipendentis atualis de sa “Villaservice Spa”, e in prus de donai possibbilidadi de pigadas a trabballai nobas e de dura e de intradas prus mannas.
Sa letura de custu istúdiu non podit e non depit lassai indiferentis: iat a essi cumenti a si ammanciai de unu crímini difícili de spricai a sa Comunidadi.
DOMANDAUS Chi fatzant bessiri púbblicus is datus uficialis chi pertocant is càusas de morti e is patologias de su territóriu, is datus de su controllu sighiu de is matricis ambientalis pruscatou in arrelatu a is territórius de Biddacidru e Sant’Éngiu, cun atentzioni particulari po su cuntestu innui s’agatat su Muntronaxu/Discàrriga e is pertinéntzias cosas suas prus acanta. Talis datus, in parti giai connotus gràtzias a unus cantu médicus coragiosus de su territóriu, denunciant unu raportu chentza duda de causalidadi intra de maladias/mortis e preséntzia de su muntronaxu/discàrriga de Biddacidru. Totu su personali médicu est allarmau e cun motivu apustis de ai biu su documentu de sa ASL n° 6 “Càusas de morti 2012-14” po su Campidanu de Mesu.
DOMANDAUS De cumpriri luegus is propostas progetualis e operativas po chi incumentzit luegus sa strategia “ARREFUDUS ZERU”, propostas aprontadas própiu po sa zona industriali de Biddacidru. Su costu de su de tres módulus, arragodeusiddu, est apretziau prus o mancu in € 15.000.000; un’impiantu de tratamentu e arrecúperu ndi iat a costai prus pagu de sa mitadi, cun efetus positivus apitzus de s’ambienti, arrecúperu de matérias útilis e cun una torrada económica e ocupatzionali.
DOMANDAUS Un’atóbiu ténnicu po si podi cunfrontai Amministradoris e Comunidadis apitzus de tali proposta, cun sa tarea de incumentzai unu camminu virtuosu chi portit a un’economia circulari, escludat sa cumpridura de un’àteru módulu de muntronaxu/discàrriga, e previdat sa bonífica de su territóriu imbrutau.
Non podeus torrai a mandai prus a longu decisionis chi si domandant puru is diretivas europeas e chi si sutaponint a proceduras de infratzioni cun costus mannus meda a càrrigu de sa comunidadi.
Non boleus essi testimóngius passivus de s’arruina ambientali e de sa bocidura lenta tramada a dannu de citadinus inniorantis.
Non depeus essi cómplicis citius de su massacru de unu Territóriu chi stimaus e chi boleus amparai cun totus is fortzas cosa nosta.
“COORDINAMENTO COMITATI SARDI”
Annalisa Caboni Operadora de s’Ufíciu de Língua Sarda Província Sud Sardigna, sea de Biddacidru.
