“Ia a bolli fai de sa Villaservice unu primori e nci creu firmamenti”. Sutaliniat su Síndigu de Biddacidru Marta Cabriolu e atzionista de maioria de sa Villaservice, sociedadi chi si ocupat de sa sperdidura de s’àliga. “Est stétia sémpiri bida, segundu su parri cosa mia, in manera unu pagheddu strumentalizada, ma fortzis puru cun unu pagheddu de beridadi”. In sa videu-interbista su Síndigu de Biddacidru fueddat puru de pagu craresa.
“Sa sensatzioni chi apu tentu, e no est scéti una sensatzioni, est de pagu craresa de sa Villaservice e s’operau cosa sua faci a foras” Sa diretzioni de sa Giunta noba est sa de fuiri is erroris eventualis de su passau. “Si nc’est sa boluntadi política de andai in un’àtera diretzioni chi est sa de su mellioramentu de s’impiantu, de su mellioramentu de is cunditzionis de trabballu, oi apustis de tantis annus de gestioni pagu crara, de seguru nci bolit tempus e impinníu meda e puru prudéntzia”. Unu citadinu cirdesu, in unu de is tantis atóbius in consillu comunali, innui si chesciànt po is bulletas tropu caras, iat nau, faci a s’ex síndigu Teresa Pani: “Su problema de fundu est, chi medas scint e nemus bolit mai nai chi a dolumannu sa “Villaservice” est simplementi, po custu puru chi fortzis non si arrannescit a ndi benni a cabu de totu is chi funt is spesas, sa “Villaservice” est su feudu de pobiddu cosa sua Siro Marrocu”.
Annalisa Caboni Operadora de s’Ufítziu de Língua Sarda Provincia Sud Sardigna, sea de Biddacidru
